Пагалыме марий калык, чыландамат шокшын саламлем «Марий ушем» мер организацийын 100 ияш лӱмгечыж дене!
100 ий жапыште мемнан эртыме корнына геройло лийын, кеч шагал огыл неле-йӧсымат, тӱрлӧ тӧрсырымат эртенна.
Ме, тачысе марий тукым, шкенан марий кугезына-влаклан вуйнам савена да кугу таум каласена. Тидым ме уло чон кумыл дене ыштена. Вет тале койышан кугезына-влак 100 ий ончыч тиде корныш лӱдде да талын шогалыныт. Вет нуно, шукышт, калыкын чынже да чон шонымашыж верч шке илышыштымат пуаш ямде лийыныт. Пӱрымаш савыртыш да таул мардеж, чаманаш гына кодеш, нунын кокла гыч ятырыштын ӱмырыштым да пӱрымашыштым кӱрыштын.
Тукым гыч тукымыш вияҥше пеҥгыде кыллан кӧра, «Марий ушем» еҥ-влакын куатыштлан кӧра шагал огыл поро вашталтыш лийын марий илышыште. Марий-влак моло калык гаяк эрык корныш шогалыныт. Кугезына-влак вий шутымо, кертмышт да моштымышт семын Посна марий кундемым почыныт, калык туныктымо да шинчымашым нӧлтымӧ пашам таҥастараш лийдыме кӱкшытыш нӧлтал колтеныт, марий сылнымутым, сымыктышым шочыктеныт да вияҥден толыныт. Да тыге мучашдымын…
Таче ме нунын лӱмыштым чылаштым каласенат огына пытаре. Тидлан иктат ок ӧпкеле манын ӱшанен, нунын кокла гыч ме икмынярыштым палемдыде ынена кодо. Тиде – Иван Николаевич Коведяев, «Марий ушемым» шочыктышо кокла гыч иктыже; Василий Михайлович Иванов, Пӱтынь Российысе I Марий Погыным ямдылыме да эртарыме сомылын ик эн тале представительже; Анатолий Степанович Патрушев, 1990 ий 8 апрельыште «Марий ушемын» I Погыныштыжо сайлыме вуйлатыше; Василий Александрович Пектеев, икымше Марий Оньыжа.
Чыла тале марий-влаклан вуйым савен, ончыкылыклан ӱшанен, 100 ияш лӱмгече дене эше ик гана.
Тек тиде событий 2017 идалык мучко паша пайрем семын эртаралтеш да шочмо марий калыкланна пайдам конда. «Марий ушемна» тек ончычсо семынак регион-влак кокласе мер организаций статусым налеш.
Регионысо «Марий ушем» мер организацийын вуйверже лӱм дене,
«Марий ушемыште» шогышо икмыняр шӱдӧ член-влак лӱм дене, –
Владимир Козлов (Лайд Шемйэр)
На иллюстрациях: Открытка, выпущенная к 90-летию «Марий ушем» в 2007 году; В день Марийского национального героя представители марийской общественники чтят память предшественников.